Историја на Македонски Железници преку фото документација

Првото железничко поврзување во просторот на Македонија се случил во 1873 година кога е воспоставена железничка врска меѓу Солун и Скопје со Ориенталната железница (CO – Chemins de fer Orientaux) по фази: Солун – Миравци во 06.06.1872 година и Mиравци – Криволак во 09.01.1873 година.

Свечeност по повод првиот воз од Велес во 1873 година за Солун, Криволак – Велес на 09.04.1873 година и Велес – Скопје на 09.08.1873 година.

На 9 август 1873 Скопје се поврзува со Солун. Фото: Железничкиот персонал од дирекциите од Скопје и Солун во 1889 година, пред железничката станица во Скопје

Во 1874 година Скопје се поврзува со Косовска Митровица. Фото: Железничката станица во Скопје.

Македонска железница од 1883 година. Ориенталната железница (Источните железници) е прва компанија која ја експлоатирала железничката врска помеѓу Солун и Скопје. Оваа железница меѓу народот, но и официјалните акти, била позната е и под името „Македонска железница“ за што говори и возниот ред од 1883 година.

Битола 1894 година. Почетокот на градење на пругата Солун – Битола е во мај 1891 и по четири години градба, Битола на 14.06.1894 се поврзува со Солун. Фото: Манаки Јанаки, Манаки Милтон во 1911 година.

Битола 1911 година. Пристигнување на железничката станица на Султанот Мехмед V Решад во Битола, снимено од страна на Манаки Јанаки, Манаки Милтон во 1911 година.

На 26.02.1916 година почнува со градба на 600 [mm] траса од Градско до Дреново во должина од 20.1 [км] за потребите на Македонскиот фронт, подоцна преименуван во Солунски фронт. Повеќе за историјата на овие пруги прашај го/ја google за:  Теснолинејка во Македонија.

Извештај за штрајкот во ложилница Скопје од 23 мај 1919 година.

Персонал за одржување од ложилницата во Прилеп на пругата Градско – Битола, со ширина од 600 [mm] снимено на 10.02.1923 година. Фото: Парна локомотива серија 99.4

Во јули 1923 година Дирекцијата за градење железници добива наредба за изградба на делницата од Велес до Штип. Градбата почнува на 01.11.1923 година и пред планираниот рок на 20 октомври 1924 година, првиот воз влегува во станицата Штип. Фото: Парна локомотива серија ЈДЖ 20.

Партизанската железница на слободната територија за три дена пренесува повеќе од 20.000 луѓе за народниот митинг во Кичево на 26 септември 1943 година со 50 вагони и 11 локомотиви од серијата 99.4 на 600 [mm] пруга. Фото: Товарен вагон серија ЈДЖ.

Прва локомотива обновена и пуштена во сообраќај на самиот крај на војната во Македонија. Гевгелија, декември 1944 година. Фото: Парна локомотива серија ЈДЖ 35.

Привремена наредба за превоз на патници, багажи и стоки по Македонски Федерални Железници. Битола, 1945 година.

Брза обнова на ложилница во Скопје, после катастрофалниот земјотрес 26 јули 1963 година.

Пуштање на новото техничко – патничко депо во Скопје, кое располага со 116 свртници и 64 колосеци во должина од 16 километри. Фото: Дизел моторен воз серија ЈЖ 712 и шинобус серија ЈЖ B 812 (фото од 1975).

Одлука од 22 ноември 1977 година за градба на железничката линија од нормален колосек, Градско – Шивец (топилница „Фени“), којшто се лоцира на подрачјето на општините Титов Велес и Кавадарци и истата ќе поминува низ атарите на населените места Градско, Паликура, Росоман, Рибарци, Манастирци, Трстеник и Шивец. Во јавен сообраќај, 17 км пруга е пуштена во декември 1982 година. Фото: Изградба на пругата (фото од 1978).

Тргнување на првиот воз од новиот Транспортен центар – Скопје на 27.07.1981 година во 12:32 часот. Фото: Методи Андов во отправничка униформа дава знак за тргнување на првиот воз.

Трансформации низ времето:
Ориентални (Источни) железници (Македонска железница) 1873
Српски државни железници 1913
Железница на Кралството на Србите, Хрватите и Словенците 1918
Југословенsки државни железници 1929
Бугарски државни железници 1941
Македонски државни железници 1944/1945
Македонски федерални железници 1945
Југословенски железници 1945
Државна дирекција на железници во Скопје 1945
Железничко транспортно претпријатие – Скопје 1963
Железничка транспортна организација – Скопје 1977
Железничко транспортно претпријатие – Скопје 1990
ЈП „Македонски железници“ ЦО – Скопје 1995МЖ Транспорт АД – Скопје 2007.

Освојувачите ни изградиле повеќе пруги отколку ние самите

Во долгата историјата на македонските железници, која опфаќа период нешто пократок од век и пол и која е приближно двојно подолга од историјата на македонска државност, сите што владееле со оваа територија изградиле барем понекое парче пруга, а изгледа дека само Македонците се најмалку заинтересирани за сопствената железница.

Почетоците на возот како превозно средство на наша територија датираат од крајот на 19 век, односно изградбата на првата пруга Солун – Скопје – Митровица од страна на Османлиите. Во 1869 година доделена му е концесија на бриселскиот банкар, баронот Хирш, кој покрај Солун – Скопје – Митровица имал задача да изгради пруги во вкупна должина од 2.000 км, со што би го поврзал Истанбул со Западна Европа. Од стоте милиони франци што биле одвоени за целиот зафат, железничката траса што минувала низ тогашната Македонија достигнала дури 27 милиони франци (според одредени податоци, ако можат да послужат за некаква ориентациска споредба, еден француски франк од 1860 година вредел колку две денешни евра, а франкот од 1907 година денес би вредел 3,5 евра). Иако станува збор за делница долга само 243 км, специфичната положба и структура на теренот ја издигнале просечната цена на секој километар на, за тоа време, огромни 110.000 франци. Во оваа цена најголем удел имаат големиот број пропусти за рекички и потоци, околу шестотини, педесет мостови за премин преку поголемите реки и клисури, од кои шест моста се преку Вардар, со вкупна должина од нешто над 1.000 метри. Кај Демиркаписката клисура, која е извонредно тешка за премостување, работеле дури 1.500 работници. За таа делница се среќаваат податоци дека ширината на патеката не изнесувала повеќе од 0,8 метри, што е многу тешко да се изведе и од безбедносен и од градежен план. Изградбата на пругата, чиј официјален почеток бил означен на 9 февруари 1871 година, траела нецели три години и таа била предадена во употреба во август 1873 година. Овој грандиозен проект на Османлиската Империја е меѓу првите од ваков тип на Балканот, ако се исклучи бугарската железница, која датира од порано.

Турско и српско

Сличен е случајот и со железничкото поврзување на Битола со Солун, кое повторно е реализирано со дозвола на Портата од Истанбул, чија идеја била да се поврзат овие два најважни града од румелискиот или европскиот дел на Турција. Должината на оваа пруга изнесува 218,5 км. И при изградбата на оваа делница германските инженери се соочиле со речиси непремостливи пречки. Дел од трасата се искачува и на висина поголема од 1.000 метри, а дека воденскиот крај е најтешкопремостлив најдобро говори податокот што за само 18 км пруга Вертекоп и Воден се споменува изградба на дури 11 тунели, со вкупна должина од 3.500 метри, 2 вијадукта, со распони од 60 до 70 метри и висина од 20 до 30 метри. Градењето почнало во мај 1891 година, а официјално завршило на 14 јуни 1894 година. Биле ангажирани 2.773 работници, меѓу кои, покрај најмногубројните Македонци, имало и Австријци, Германци, Турци, Срби, Италијанци, Грци и др. Само за потсетување, Македонија денес нема директна врска помеѓу Битола и Солун, а транспортот на стока мора да оди дури преку Велес, што за двојно ги зголемува и временските и финансиските бариери и ги намалува можностите за економско поврзување на овој денес поделен реон.

Поврзувањето на Велес и Битола е остварено дури за време на српската окупација на вардарскиот дел од Македонија, поточно во 1923 година. Бидејќи по Балканските војни и Првата светска војна наполно е сменета геополитичката конфигурација на оваа територија, и приматот паѓа на Скопје и на Битола во отсуство на Солун, тогашната кралска власт од Белград се одлучува да го поврзе најоддалечениот голем центар Битола со Скопје и остатокот од тогашната држава.

Кон крајот од истата 1923 година, поточно на 1 ноември, Србите пуштиле во употреба нов значаен железнички крак, Велес – Штип, со што биле поврзани трите географски целини на тогашната Вардарска бановина: истокот, Повардарието и западот.

Македонска држава

Дури и Централните сили имале свој придонес во изградбата на железницата. Поради речиси никаквата инфраструктура со која располагале на окупираните подрачја преку кои требало да се снабдува македонскиот фронт, била донесена одлука да се изгради 600-милиметарска пруга, кај нас популарно наречена теснолинејка. Планот бил пругата да се протега во два правци, централен и западен, за да може од повеќе страни да се врши брз и квалитетен дотур на луѓе, оружје и друг потребен материјал. Првата централна траса се протегала од Градско до Прилеп, преку Плетвар, на тој начин што ги спојувала и двата веќе функционални железнички правци Битола – Солун и Солун – Скопје.

Употребата на жичници за премостување на непроодниот терен е специфичен пример на тогашната германска и австроунгарска техничка супериорност. Дреново – Прилеп, Демир Капија – Рожден и Степанци – Прилеп се само дел од насоките премостени со жичници, изградени за време на Првата светска војна од страна на германски и австриски инженери, кои заедно со стотиците километри пруга, широка шестотини милиметри, формира сложен транспортен систем, кој покрива добар дел од територијата на вардарска Македонија.

Особено интересен е западниот крак на оваа иста пруга, бидејќи трасата од Скопје преку Тетово, Гостивар и Кичево продолжувала кон Охрид и Елбасан. Денес многумина во Македонија сметаат дека е речиси невозможно да се изгради пруга кон Охрид, не знаејќи дека таква линија веќе постоела пред речиси 100 години. Трасата била целосно завршена во 1917 година и била изградена за нешто помалку од една година. Таа била во употреба дури до 15 мај 1966 година, кога теснолинејката била укината и запустена. Така, и до денешен ден, до Охрид, нашиот најголем туристички и значаен индустриски центар за нашите услови, не може да се стигне со воз. Пругата завршува во Кичево, на околу шеесетина километри оддалеченост од Охрид.

По ослободувањето во 1945 година, македонската држава не седела со скрстени раце и до 1990 година биле изградени нешто повеќе од 200 километри нови линии, паралелно со модернизирањето на старите траси, чија широчина денес изнесува 1,43 метар, потоа електрификација и сл. Но останува впечатокот дека во Република Македонија, гледано само низ километри, поголемиот дел траси ги имаат поставено странци.

Пруга низ Скопје од 1873 до 1972. Обработката на 5 монтажи, од пријател на Е-мобилност: Владимир.

This slideshow requires JavaScript.

кон зеро – историја на макжелезници